Terugvoer: Royal Family Kids Kamp

Hallo vriende!

Dis vir my so lekker om bietjie terugvoer te gee oor die kamp wat ek in Junie bygewoon het. Weet dis nou al ‘n rukkie terug maar dink tog dit sal goed wees om met julle te deel.

Hier onder is ‘n groepfoto van die vrywilligers wat hulle beskikbaar gestel het die week wat ons weg was. Ek kan eerlik sê op albei kampe wat ek bygewoon het is daar ‘n enorme opgewondenheid wat heers voor en tydens kamp.

Hierdie mense se harte is vol omgee vir die kinders, om die kamp vir hulle onvergeetlik te maak is fokus nommer een. Dalk wil jy dit oorweeg om betrokke te raak? Jy is baie welkom. Ek weet van een wat oppad is. Dit is in Desember, die Benoni groep se jaarlikse kamp.

Hierbo is ek en Kemi, my mede ‘counsellor’ vir die week besig om ons kamer te versier en verwelkomend te maak voordat die kinders met wie ons die kamer gedeel het tydens die kamp arriveer. Ons tema vir die week was ‘The Lord is my Shepherd’ daarom die skapies!

Seker dit is geen verrassing maar die dogterjies wat ons kamer gedeel het, het hulle kamer gelove!

Die kinders is gedurende die week geseën met pragtige geskenkies soos byvoorbeeld by hulle onderste-bo agterste-voor verjaarsdag-partytjie, het my kop daai dag gespin. Die Woord van Abba is nie nagelaat. Elke oggend was daar ook Bible Club, poppespel en al!

Die week is tjok en blok met aktiwiteite wat wonderlike herinneringe skep om saam terug te neem en altyd te koester. ‘n Hindernisbaan en handwerk-stasies het hulle onder andere gehelp om soos-hulle-gemaklik-voel en aangemoedig-word struikelblokke en vrese te oorwin.

Hier kry ek en Kemi ‘n vinnige kans om ook deel te neem aan pyl-en-boog-skiet, een van die aktiwiteite wat die kinders baie geniet het. En daar skiet Kemi toe wragtie ‘n bullseye!

Ek onthou op een van die dae het ons ‘n dagstap gaan doen in die berge. Watter wonderlike geleentheid het Abba my toe gegee om prakties te kan uitbeeld wat dit beteken om die leiding van ons Hemelse Herder te vertrou.

Ek het een van die dogtertjies saam met wie ek ‘n kamer gedeel het se hand geneem en vasgehou soos ons begin stap het. Meer in ‘n poging om haar naby my te probeer hou want sy was nogals ‘n rats een en baie gereeld vinnig onder my oë uit.

Soos ons stap besef ek dis ‘n gulde geleentheid vir ‘n teachable moment en ek sê toe vir haar dat Jesus ons ook so mooi wil lei soos wat sy my lei. Ek kon sommer sien hoe die aanmoedigende woorde presies doen waarvoor dit gestuur is. Sy het elke nou en dan ‘n watch out laat hoor en so deeglik en versigtig te werk gegaan om my veilig te hou. Dit was so kosbaar vir my en ek bid dat sy dit vir altyd sal onthou.

Ons het ook ‘n kampliedjie wat hope pret en dans beteken. Die kinders en grootmense wikkel daai heupe dan lekkerrr.

Daar was ook ‘n cowboy aand en hoe het die kinders die op-dress met hoed en serpie geniet. Hulle het nie daardie spesifieke aand enige aanmoediging nodig gehad om aangetrek te kom!

Met die terugkeer is mens dalk fisies en emosioneel meer moeg as vroeër die week maar die harte is propvol. Selfs ons, die volwassenes, groet met heimweë en prag-herinneringe. Ons sien dalk nie maklik weer die kinders nie maar in ons gedagtes en gebede bly hulle voortleef.

Hierdie kampe het nogals rerig kom nes skrop in my hart. Ek glo in hulle. Abba gebruik hulle om stukkende kinderlewens op te beur en hoop te kom plant. As jy meer informasie benodig, kontak my gerus of sommer direk vir die span. Hulle webtuiste is: https://www.i-c-y.co.za of https://rfk.org/.

Baie dankie vir elkeen van julle wat deel was van die kamp, of dit nou met gebede of finansies was. Julle deel in die vrug wat voortkom! Elke kindjie wat op die kamp was is dankbaar. As julle hulle totsiens-briefies of -gesiggies kon lees sou julle saamstem.

Hoop julle het die kiekies en nuus van die kamp geniet.

Liefde en goed-gaan vriende.

Letitia

Nota:

As jy weet van enige projekte of waardige sake wat Liefde in Aksie – ons praktiese omgee been hier by die blog – kan ondersteun laat weet gerus. Ek sal graag wil weet daarvan of selfs net bewusmaking wil skep soos Abba lei. Dankies!

Advertisements

Royal Family Kids Kamp 2019

Hallo vriende,

Hier volg opwindende nuus van die blog se praktiese omgee been Liefde in Aksie!

So dis amper tyd vir die Royal Family Kids kamp wat die Kempton Park span van I.C.Y. hierdie jaar gaan aanbied en ek raak elke dag meer opgewonde daaroor want ons gaan weer die geleentheid kry om seer kinderharte se lewens aan te raak met Jesus se hoop & omgee. Die kamp gaan wees vanaf 23 tot 28 Junie.

Net om julle weer te herinner aan hierdie organisasie en die wonderlike werk wat hulle doen, hiermee hulle pamflet:

Van julle sal onthou dat ek laas jaar se kamp bygewoon het as vrywilliger en Liefde in Aksie verteenwoordiger. Ek sal graag vir ‘n tweede keer wil saamgaan om Jesus se hande en voete te wees. As jy my wil borg of ‘n bydrae wil maak is jy baie welkom. Laat weet my asseblief. Ek sal dit so waardeer. My spaarbussie vir die kamp is sover 1/3de vol. Die koste as vrywilliger beloop R1 500.00.

Daar is ook ‘n lysie van benodighede as julle so wil help ondersteun. Hier is hy…

En dan. Sal jy asseblief saam-bid dat elke kind wat op die kamp kom ‘n spesiale ontmoeting met Jesus sal hê? Dat Sy sagte liefde kans sal kry om hulle seer harte aan te raak en gesond te maak. Dat Hy Sy ware hoop diep in hulle harte sal kom plant. En dat hulle HOPE pret sal hê!

Hy is die omgee agter Liefde in Aksie se hande en voete. Dankie dat julle ons in staat stel en dat julle ook glo in ‘n verskil maak. Al is dit net met vriendelik-wees. Die wêreld kyk dikwels neer op kindness maar in Abba-God se oë tel dit soveel.

Weereens dankie.

Liefde julle!

Letitia

Royal Family Kids Kampe!

Liewe vriende,

Hoop dit gaan baie goed met julle almal. 🙂

Ek is opgewonde om julle te vertel van ‘n wonderlike projek wat so paar maande terug my pad gekruis het. Lees meer daaroor hieronder!

Royal Family Kids Kampe. Kampe met soveel amazingness. Sjoe my hart word skoon warm en hartseer tegelyk wanneer ek na videos oor dié kampe kyk. Warm omdat daar mense is wat omgee. Hartseer omdat daar soveel kinders is daarbuite wat diep pyn ken.

Ek stel julle graag voor aan I.C.U. / Influeincing Children & Youth (http://www.i-c-y.co.za). Hulle is ‘n nie-winsgewende organisasie gewy daaraan om die lewens van mishandelde en verwaasloosde kinders tussen die ouderdom 7-14 op te helder.

Een van die maniere waarop hulle dit doen is deur jaarlikse kampe en mentorskap-programme aan te bied vir hierdie minderbevoorregte kinders. Kinders uit die gemeenskap wat nie die omgee en liefde van ‘n gesonde gesinsverband ken nie.

Hulle doen soveel moeite om die kinders spesiaal en geliefd te laat voel gedurende die 5-dag kamp. Die kinders word ook in hierdie tyd vertel van God se liefde, die Kruis van Jesus en dat daar ‘n plan vir hulle elkeen se lewe is.

Benoni, Roodepoort, Secunda, Alberton, Ladismith (in die Kaap), Brits en Namibië is voorbeelde van waar die kampe aan die suide van die Afrika kontinent aangebied word.

Vind hier uit hoe mens hulle kan help met hierdie jaar se Kempton-Park kamp:

Met die hulp van ons ondersteuners kon & kan Liefde in Aksie (ons praktiese omgee-been) al R 925.00 bydra vir hierdie jaar se kamp benodighede. So wonderlik, dankie julle!

Maar daar is nog ietsie wat ek graag met julle wil deel. Ek sal die kamp (24 Junie – 29 Junie 2018) baie graag wil bywoon as vrywilliger. Dit sal vir my ‘n voorreg wees om saam met die res van die span vir die kiddies te gaan wys hoe Jesus se liefde in aksie lyk. Hiervoor benodig ek R1 200.00. As jy in jou hart voel om ‘n bydrae te maak in hierdie verband is jy welkom om my te laat weet of RFK as verwysing te gebruik met jou donasie inbetaling.

Baie dankie vir jou omgee, al is dit net om in jou gebede aan die seer-hart-kinders van hierdie wêreld te dink. ‘n Verskil kan ons maak! x

Kyk hier om te sien hoe die kampe lewens impakteer…

Dankie dat ek kon deel.

Groetnis en baie seën!

Letitia xxx